20 Sano oo Doorashooyin Dadban ah Kaddib: Suurtagal Ma Tahay in Soomaaliya Laga Hirgeliyo Nidaamka Doorasho Qof iyo Cod ah?
Waxaa maanta ka dhacay ArdaagaSpace dood muhiim ah oo laga falanqeeyay su’aasha ah: “Kadib 20 sano oo doorashooyin dadban ah, ma suurtagal baa in Soomaaliya laga hirgeliyo nidaamka doorasho qof iyo cod ah?”
Aqoonyahanno kala duwan oo ka soo jeeda dhinacyo badan oo siyaasadeed iyo bulsho ayaa ka qeybgalay, waxayna si qoto dheer uga wada hadleen suurtagalnimada iyo caqabadaha horyaala hirgelinta nidaam doorasho qof iyo cod ah. Doodda ayaa sidoo kale lagu gorfay caqabadaha amni, dhaqaale, iyo wacyiga bulshada ee la xiriira nidaamka cusub.
Mid ka mid ah ka qeybgalayaasha ayaa xoogga saaray amniga dalka, isagoo sheegay in xoreynta dalka ay muhiim u tahay hirgelinta nidaamka doorasho qof iyo cod ah. Waxa uu sidoo kale tilmaamay in tirakoobka dadka iyo dhammeystirka awoodda amni ee dalka ay yihiin qodobo muhiim u ah horumarka iyo siyaasadda mustaqbalka.
Waxaa la iftiimiyay in wadar-ogolaanshaha ay muhiim tahay si loo xaqiijiyo nidaam doorasho oo qof iyo cod ah, iyadoo lala heshiinayo dowladaha xubnaha ka ah dowladda federaalka. Tani waxay noqon kartaa tallaabo muhiim ah oo lagu xoojinayo isku xirnaanta siyaasadeed iyo bulsho ee dalka.
Natiijooyinka doodda waxay iftiimiyeen fursadaha iyo caqabadaha jira, iyadoo la soo jeediyay talooyin muhiim ah oo lagu xoojin karo geeddi-socodka dimuqraadiyadda Soomaaliya.
Soomaaliya waxay u baahan tahay in la helo wada-shaqeyn dhexmarta dowladda, bulshada rayidka ah iyo beesha caalamka si loo xaqiijiyo nidaam doorasho oo qof iyo cod ah oo hufann, ayaa ay ku soo gebogabowday doodda.